呢个星期，真系经典。
过左好辛苦既一个星期，
更过左好瘀既一个星期。

瘀，瘀到我都不堪回首难以面对。
一个星期五日里面竟然瘀足三锅。
你话系米经典中既经典？
但愿系瘀极泰来，实在唔想有更经典。

星期一，着左件唔记得剪标签既衫返工，
背脊挂左个牌成日，出出入入招摇过市，
谂下额头都要划三条黑线。
唯一庆幸既系加班早出晚归，
避开光天化日人最多既时候，
稍微降低左示众范围。

星期五，一向沉默平静既主编小女人大人，
貌似终于忍无可忍，过黎指导左我一大轮。
客观黎讲系好事，
点醒我啊嘛，增益我所不能啊嘛。
但系主观上黎讲，
我坐个位大概系工作区既中间，而当时周围又万分寂静，
所以现场效果系，一半以上既同事，包括我带既实习生，
都听到：你最近更新得好慢，你唔系新黎既，你黎左几个月，唔应该系甘既进度，你用呢种颜色呢种字体呢种风格，唔够彻底，好梁啊……
当然，等据如此这般喷左十几分钟之后，
最后我都系隐忍低调甘讲：明白，谢谢。

《世说新语》云：唾面自干。
世聪上次提醒我《圣经》里面既一句话：
人打你左脸耳光，你要把右脸也凑上去。
谂起前两日睇既一篇评论，叫做《阿娇，是该向璩美凤学习的时候了》
不断鼓励自己唔要面先吃得开，千祈唔好介意，
或者千祈唔好比人知你介意，否则点捞落去啊。

但情感上，自然讲到我心都痛晒。
呢个星期系最辛苦既一个星期，
屋企离公司一个钟以上车程，又日日早半个钟返工，迟一到三个钟落班不等，
五日一共训左20个钟。
本来系冇所谓既，我从来唔计较呢D。
但事实既荒谬就系呢度，
原来之前既反省其实系岩既，唔应该甘用心工作，
或者应该学识聪明甘使用“用心”呢样野，国人云：好钢用在刀刃上。
否则，结果反而害左自己，今次可以收录为私人经典案例。
一个人，首先要识得爱自己，如果唔系根本唔配有好命运。

另外就系“彻底”呢回事。
忽然醒悟，自己好似真系太唔彻底，理想如是，其他如是，
目前一切就系妥协，或者讲平衡既结果。
但系开心咩，值得咩？我系米应该彻底D？
曾经点点点既我，宜家竟然比cheap cheap冇point单位鄙视，
日日同机器搏斗，同软件同代码纠缠，比唔系自己个范既标准挑剔审判。
deal。
存在感同价值感同时失重。

当然，呢个世界唔系因你先存在既，
而你系因份工而存在既，你系米想唔捞啊？
张爱玲讲过，据笔下既人物都系唔彻底既，
师太今日都话，呢个世界都系唔彻底架啦。
系，彻底既人生，一般只有两个结果：极成功，极失败。
前者系沧海一粟，后者系汪洋大海，
稀有既前者往往会被放大，班后者就系甘受害既。

关于“适合”呢回事。
系xina觉得xina唔适合，系呢度觉得呢度唔适合，将来如果去左第度，又可能觉得第度其实唔适合，
究竟系应该自己削足适履，定系离弃一切全力追寻理想？
个中既“度”究竟系边度？

仲有一锅瘀野就系，都系唔洗讲喇，受邀睇卜既寥寥亲友我都私下倾诉过。
如果系真既，
真系惶恐唔好意思难以面对，从未如此瘀过，
但系大家听完之后都不约而同甘觉得好high好娱乐，
唉，有冇考虑过我既未来啊你地班看客。

够啦。
简直难以置信，一向小心缜密既自己，
竟然前所未有甘一周瘀三锅，空穴来风未必无因，
甘失常，原因系乜？
无端端甘心痛，又讲唔清究竟为乜，简直好似心脏病人。
系无奈中，默默甘将D脆弱既碎片执起身，
一块一块，重新拼凑成所谓坚强。

不过，如果有个雷人排行榜，
我谂我绝对系今个星期既雷人之星。
——能够自嘲，证明冇事。